Laut unsere letzte bekoannte Uffzeichnunge werd die Zimmner Kerb schunn mindestens 525 Joahr long gefeiert.
Iwwerlejgt mol: 1491! - Do wor Amerika noch nit entdeckt. Des bassierte 1 Joar sperer!

Des kam durch ein halbamtliches Schreiwe - Souzusoache Oamtsgeläf - ons Tacheslicht.
Ursach wor en Streit iwwer de Ausschonk von Festwoi zur Kerb.
Durch die Dokumentation kenne mer voller Stolz feststelle, dass die Kerb sogoar noch älder is, wie die Dibbojer Fassnoacht!

Die Zimmner Kerb werd schon immer sou gefeiert, wie mer des heit sou mache, bis uff die neie technische Raffinesse, wie Geddoplasder mit 10.000 Watt und Tieflader mit riesische Uffbaude. (*lach*)

De Kerbvadder war als Institution ewwer vun Oafang ou schunn debei. Frieher hots ewwer noch koan Mundschenk gäwe, sondern dem Kerbvadder hot mer oafach zwaa sougenoannte Herolde beigestellt.

Ab 1938 hots donn aach e Kerbmädche gäwe. Des konnt doann ewwer 1939 nit wiederholt wern, da 1 Woch vor de Kerb de Kriesch ausgebroche is.
Noch em Kriesch gings donn 1949 weirer mit Kerbfeiern.

Anlässlich dem 525 jährische Jubiläum häwwe die Kerbvädder in einem historische Marsch, von Jugenheim-Seeheim nach Zimmern, den Weg des damalischen Woihändlers nochvollzoche und bei der Gelechenheit aach dem damaliche aktuelle Joahrgang soi Kerbbobbe glei mitgebrocht. Alle Beteilichte schwärme heit noch devo.

Unn sou feiern mer heit anoch ... ... immer am 1. Sunndoag noch St. Bartolomä!